PRoMete - Kasıb Yolçu / məqalə...

[img][/img]
KASIB YOLÇU


Vaxt var idi azadlıq arzusunda idim…

Azadlığı üstündə “usa” yazılmış papağı almaqda görürdüm. Yadımdadı üç ay ağlamışdım

bu papaqdan ötrü onda ailədə maddi vəziyyətimiz yaxşı deyildi. Anam isə sanki

“imkanımız var, amma sənə bu papağı almırıq” kimi aparmışdı özünü. Və mən onda

birinci dəfə özümün pul qazanmalı olduğumu dərk eləmişdim. Və qazanmağa da başladım.

Aliminium və butulka yığıb satdım bir həftə ərzində papağa lazım olan məbləği

topladım(3 məmməd). Amma papaq almadım pulu gətirib evə verdim. Artıq azad idim…

Vaxt var idi azadlıq arzusunda idim…

Papaq da az gəlmişdi. Sumqayıtda birinci dəfə kompüter kursları açılanda

(6-cı sinifdə oxuyurdum). Mən bu dəfə üç il ağlamalı oldum. Gözlərim zəif olduğu

üçün eynək taxırdım. Ona görə də ancaq 9-cu sinifdə məni kurslara getməyə qoydular…

Kompüter gözlərimə doğrudan da təsir etdi - üç ay ərzində gözümün fokusu düzəldi

və mən artıq uzağı yaxşı görürdüm… həm də azad idim!

Vaxt var idi azadlıq arzusunda idim…

Uşaqlıqdan atam məni “instituta girmək sənin birinci amalın olmalıdı” deyə böyütmüşdü.

11-ci sinifdə oxuyanda imtahana bir gün qalmış məni çağırıb dedi ki, girməsən də narahat

olma. Çünki bu da son deyil. İmtahan sabah idi. Mən gecə yata bilmədim – imtahana getdim,

imtahan verdim, axşam balları toplayanda 500 balı keçdiyim bəlli oldu. İmtahanın

nəticələri çıxanda isə atamın gözləri dolmuşdu…

Mən növbəti dəfə azad idim… həm də atamla birlikdə!


Vaxt var idi azadlıq arzusunda idim…

Evdən ayrılıb kirayə yaşamaqda, öz evimdə yaşamaqda görürdüm azadlığı. Və indi yaşayıram.

Amma yalnız bura köçəndən sonra dərk eləmişəm ki, bu vaxtacan seçdiyim hədəflər mənə kiçik

azadlıqlar bəxş eləsə də ən böyük azadlığıma hələ də çatmamışam…

Mən sadəcə bu yolda yol kənarında evlər tikərək gedirdim. Amma heç bir ev mənim mənimi

özündə qonaq edə biləcək qədər böyük deyildi.

Və mən artıq ev tikməmək qərarına gəlmişəm. Çünki tikdiyim evlərə mənim güclə sığışırsa

sizi ora necə yerləşdirəcəm?!.

Odur ki, mənə sadəcə bu yolda getmək belə bəs edər.

Kim istəyir gəlsin!

Mən AZADLIQ arzusundayam…